RECEITA PARA PREPARAR XABARIL OU CORZO

Xosé Manuel García, o noso parente, grande cazador e mellor cociñeiro facilítanos a súa receita para preparar un anaco de xabaril ou de corzo. Compartímola cos seguidores da web de Os Parentes e se se animan a probala que lles aproveite.

1.- Desconxelar o Xabaril/corzo.

2.- Deixalo a remollo durante dous días para macerar. Poñemos nunha pota de barro a carne xa cortada en anacos como ha de ir á mesa e as verduras (cenoria, pemento verde e vermello, porro, cebola, tomate enteiro). A cantidade de verduras depende do gusto de cadaquén. Engadir allo e perexil.

Cubrimos todo con viño tinto de calidade, que quede medio cuberto sen que se enchoupe. Mellor Ribera del Duero ou Rioja, o Ribeira Sacra pode ser acedo e pasarlle o sabor á carne. Cada vairas horas hai que remover carne e verduras embebendo ben todo.

3.- Preparación do asado. Un anaco antes ponse a escorrer, retíranse o líquido e as verduras quedando só a carne. Xa se lle bota o sal, o allo e o perexil.

Despois hai que douralo nunha tixola e volvelo á pota de barro para cociñar.

Vólvese poñer un viño novo mais agora serve tinto (o asado sairá máis escuro) ou branco (máis claro) e unhas verduras novas. Ponse todo no forno, halle levar as súas dúas ou tres horas. Hai que ter coidado de que as verduras non se tosten ou pasen moito. Para iso é moi importante regar verduras e carne cun caldo xa preparado: póñense nunha pota anacos de carne de becerro ou pito e faise un caldo co que se vai regando o asado.

Revólvese cada tempo e cando falten uns 30/40 m póñense as patacas no mesmo prebe, mellor desas pequenas redondiñas, que non sexan moi grandes os anacos.

Cando estea pasadiña a carne ponse a pota na mesa e sérvese; e agora si lle aquece un Ribeira Sacra da nosa terra.

 

Nota: e que a carne non sexa dun macho vello coma o da foto, que sempre sairá moi dura de roer. Mellor un animal máis novo